Na Žabljaku su počeli hladni dani sa temperaturama koje su se spuštale ispod nule pa su u OŠ “Dušan Obradović” počeli grijati učionice.
Direktor škole Željko Miljić kaže da se zagrijavanju pristupilo zahvaljujući zalihama plina koje su se zatekle u rezervoarima.
“Imamo gasa za narednih desetak dana, a potom sve zavisi od toga kako će u ministarstvu uskoro riješiti problem. Nadam se pozitivnom ishodu kako bi se nastavio normalan rad i djeca boravila u zagrijanim prostorijama”, kaže Miljić.
Na pitanje Antene M, Miljić je kazao da u školi nema alternativnog načina za zagrijavanje prostorija, strujom ili na čvrsto gorivo, jer su peći odavno uklonjene iz učionica a nijesu obezbijeđena ni drva.
U OŠ “Vuk Knežević” Njegovuđi grijanje je riješeno tradicionalno, loženjem peći u učionicana. Direktorica Željka Vulanović kaže da su obezbijeđena i pripremljena drva, dovoljne količine za narednu školsku godinu.
