Glavni kandidati Ten Hag i Poketino
Mančester junajted će do kraja mjeseca donijeti odluku o tome ko će biti menadžer kluba u narednoj sezoni, objavili su ostrvski mediji.
Kako se navodi, u velikom klubu Premijer lige su svjesni da će borba za četvrto mjesto do kraja ove sezone biti teška. Planiraju se velika ulaganja na ljeto, kako bi prvi tim bio konkurentniji u borbi za vrh po mnogima najjače lige kontinenta. Angažovanje novog menadžera se smatra poslom koji treba što prije završiti, kako bi novi strateg učestvovao u selekciji ekipe za narednu sezonu, uz angažovanje brojnih pojačanja.
Trenutno samo dva imena figuriraju kao potencijalni menadžeri Junajteda: strateg Ajaksa Erik ten Hag i trener Pari Sen Žermena Maurisio Poketino. Kako su objavili britanski mediji, Holanđanin Ten Hag je bliži klupi kluba sa ,,Old Traforda“, njegov sistem igre u Ajaksu i brojni uspjesi oduševili su čelnike kluba i aktuelnog, privremenog menadžera Ralfa Rangnika.
Kada je Argentinac Poketino u pitanju, uprava pariskih ,,svetaca“ ne želi da ga se trenutno odrekne, a ako se njegov tim plasira u četvrtfinale Lige šampiona, izvjesno će ostati na mjestu trenera.
Takođe, Ten Hag je znatno jeftinije rješenje, a aktivno uči engleski kako bi riješio jezičku barijeru.
